Google fjárfestir fyrir milljarða í Finnlandi
Tæknifyrirtækið Google ætlar að fjárfesta fyrir meira en þrettán milljarða evra í Finnlandi á næstu tveimur árum. Það eru nálægt tvö þúsund milljarðar íslenskra króna.
Fyrirtækið sagði frá þessu í morgun. Til stendur meðal annars að byggja gagnaver, það er stórar byggingar með tölvum sem vinna úr upplýsingum. Þessi tölvubúnaður á að nýtast fyrir starfsemi sem tengist gervigreind. Google ætlar líka að fjárfesta í orkuinnviðum, því slík gagnaver þurfa mikla orku, og vinna með sveitarfélögunum þar sem byggingarnar munu standa.
Í tilkynningu frá Google kemur fram að þetta sé stærsta fjárfesting sem fyrirtækið hefur ákveðið í Evrópu. Google hefur verið með starfsemi í Finnlandi í fimmtán ár, svo landið er fyrirtækinu vel kunnugt.
„Ákvörðun Google er til marks um styrk okkar á þessu sviði,“ segir Petteri Orpo, forsætisráðherra Finnlands, í fréttatilkynningu fyrirtækisins. Finnsk stjórnvöld hafa undanfarið lagt mikla áherslu á að fá fjárfestingar af þessu tagi til landsins, því þau telja að þær skapi störf og styrki hagkerfið.
Google segir að verkefnið muni styðja við um 37 þúsund störf í Finnlandi á meðan byggingin stendur yfir. Eftir að framkvæmdum lýkur og reksturinn er kominn í gang munu um sjö þúsund störf byggja á starfseminni.
Mörg tæknifyrirtæki hafa á síðustu árum leitað til Norðurlanda þegar þau reisa gagnaver, og þessi ákvörðun sýnir að Finnland er orðið eftirsóknarverður staður fyrir slíka uppbyggingu.
